Libro de Nadal

Que agradecida é a Balteira! Como lle andamos a remexer os fondos, tiña preparada unha sorpresa cando chegaramos ao D.

Isto que vos estou a contar parece un galimatías pero, en breve, farase a luz ao final deste túnel ficticio no que nos adentramos para que poidades atopar mais rapidamente os libros que procurades na Biblioteca.

En fin, o dito, que cando chegamos ao D e rematamos de ordenar os fondos de Charles Dickens, as linguas falaron entre elas e chegaron á conclusión de que o libro de Nadal non podía ser outro que A Christmas Carol ou Un conto de Nadal ou Cuento de Navidad… Quen dá máis?

Desde a Biblioteca do IES Mendiño facemos esta invitación á lectura deste “librito espectral” que o novelista inglés adicou aos seus innumerables lectores no mes de decembro de 1843.

Por outra banda, gardaba a Balteira no refaixo Cuentos de Navidad, unha excelente escolma de relatos preparada pola tamén escritora Marta Rivera de la Cruz: Dostoievski, Maupassant, Scott Fitzgerald, Emilia Pardo Bazán, Chéjov, Rubén Darío e, como non, Ramón del Valle-Inclán figuran entre outros nomes nesta antoloxía.

Con estes agasallos sorpresa da Balteira facemos unha aposta polo plurilingüismo, sempre enriquecedor, por un clásico tanto en versión orixinal como en versión adaptada e, como non, polo espírito do Nadal. Que este encha de paz e bondade as vosas vidas!

E non esquezas que Walt Disney Pictures tamén ofrece da man de Robert Zemeckis a versión cinematográfica de 2009 como recreación do relato de Charles Dickens.

De loito e coa porta violeta

Hoxe é 25N. E desde 1999, hoxe tamén é un día para lembrar e para reivindicar. Para lembrar que nun día como o de hoxe hai 65 anos asasinaron ás irmás Mirabal, as bolboretas, porque lle dixeron NON a un ditador, Rafael Trujillo. Un non que onte e hoxe sega vidas.

Mais tamén un día para reivindicar que Patria, Minerva e María Teresa teñen hoxe outros nomes e outros rostros; pero a mesma sorte. Reivindicamos a Karilenia, Catalina, Doreen, Eva, Andrea, Joana, Josefa, Diana, Marta, Rocío, Miriam, María, Pilar, Maritza, Zunilda, Marisa, Alejandra, Susana, Mª del Carmen, Ramy Virginia, Josefina, Lola, Mercedes, Ilham, Rosalía, Mercedes, Ginesa, Jacqueline, Eva, Verónica, Yolanda, Marta, Ainhoa, Zahra, Cristina, Eugenia, Silvia, Pilar, Marisol e tamén ás tres crianzas vítimas da violencia vicaria: Nadia (5 anos), Eva Yasmin (13 anos) e Samuel (2 anos). 

Elas son o motivo polo que, desgrazadamente un ano máis, temos que saír ás rúas e abrir os nosos ollos para descubrir as diferentes máscaras baixo as que se agocha o patriarcado para sementar silencio, invisibilidade e sempre morte a través das diferentes violencias: física, psicolóxica, económica, vicaria....

Por iso puxemos á Balteira de loito: a súa camiseta é negra; a súa saia está feita de lápidas co nome destas corenta e tres vítimas. Son tantas, que tivemos que superpolas nas capas da saia.

Aquí tedes a resposta todas aquelas persoas que comentades: “también hay hombres maltratados por sus mujeres”. As 43 mulleres despoxadas da súa dignidade que visten a Balteira son a resposta.

Con amor a Sofía

Hoxe, 20 de novembro de 2025, por ser o terceiro xoves do mes de Santos, celébrase o Día Mundial da Filosofía. A UNESCO así o proclamou no ano 2005 para salientar o valor desta disciplina para o desenvolvemento do pensamento humano, para cada cultura e cada individuo.

Tamén a nosa Balteira se suma á conmemoración e quere subliñar, da man de Sofía, que son moitas as preguntas para pensar, para reflexionar aínda que non resulte doado dar coas respostas. Velaí o reto, sen dúbida, apaixoante.

Na obra de Jostein Gaarder, que vos aconsellamos, a protagonista conta cun misterioso profesor particular de Filosofía que, con desafíos constantes, busca espertar nela o asombro ante múltiples cuestións tratadas: a complexidade da verdade, o senso da vida, a mensaxe radical de salvación defendida por Xesús, o entusiasmo de Platón polas Matemáticas…

Agardamos que nalgún instante da vosa vida deixedes que a Filosofía entre pola porta da reflexión e do coñecemento.

Para mamis e papis II

Cantos quebradeiros de cabeza cos nosos fillos ao longo da vida! E, cantas ledicias, cantas experiencias enriquecedoras, cantas aprendizaxes xuntos/-as, canta vida traen ás nosas vidas!

Por  se aínda estades nesa franxa de pais e nais noviños/-as, a editorial Alba propón tres lecturas que, ogallá, axuden na apaixoante aventura de criar fillos/-as felices, responsables e boas persoas.

A primeira ofrece tamén a versión para nenas e o seu autor é un psicólogo infantil e terapeuta familiar de orixe australiana. O índice xa dá claves para saber cales son os asuntos tratados: as etapas na infancia, a relación entre nais e fillos, a sexualidade, o deporte, os cambios hormonais…

A segunda é un afondamento no cerebro do neno e brinda estratexias para axudarnos no desenvolvemento da intelixencia emocional a partir de situacións da vida cotiá. Empatía, ética, emocións, etc., desfilan polas páxinas deste libro xunto cos diálogos e as viñetas, nos que é imposible non verse reflexado/-a. Finalmente, para a seguinte fase evolutiva –dos doce aos vintecatro anos–precisamos Tormenta cerebral. Esta lectura pode funcionar como bo paraguas cando chegue a etapa do cambio que pode poñer o fogar patas arriba. O autor é profesor universitario de Psiquiatría e rompe no libro coa visión estereotipada da adolescencia por ser esta decisiva á hora de construír á persoa adulta na que acabarán convertidos os fillos/-as.

Bo proveito, xa que logo, cando vos animedes a solicitar estes fondos na Balteira, a Biblioteca do IES Mendiño.

Libro de Santos

No ano 2001 a UNESCO declarou o 10 de Santos como Día Mundial da Ciencia para a Paz e o Desenvolvemento. Por esta razón, desde hai xa anos novembro pasou a ser Mes da Ciencia. E, asemade, o profesorado de Galicia celebra en novembro o Mes da Ciencia en Galego para amosar que a nosa lingua galega é útil e tan válida como calquera outra para facer pescuda, ensino e divulgación científica.

 

A Institución Galega de Ciencia (Igaciencia) conmemora o XVI Día da Ciencia en Galego e neste ano 2025 porá o foco na celebración do “Ano Internacional das Ciencias e Tecnoloxías Cuánticas”.

E nós? Pois o libro do mes de Santos non podía ser outro que un informativo escrito en galego arredor da ciencia. Coidamos que o formato é ideal para 1º de ESO e 2º de ESO pois en cada páxina son moitas as ilustracións. A estrutura pregunta e resposta fará de todos e de todas persoas máis enxeñosas e sabedoras do que acontece ó noso arredor.

Olla!: a Balteira de científica!