Presentamos unha selección das nosas últimas adquisicións. Polo de agora, tócalle á ficción pero en breve veredes que todas as seccións da Biblioteca van medrar pensando ante todo nas familias, no noso alumnado e nos diversos intereses de toda a comunidade educativa.
Aínda que a versión máis coñecida dun dos dez libros máis vendidos é Diez negritos, a editorial Espasa recupera o título orixinal inglés e presenta Y no quedó ninguno da afamada autora de novela negra: Agatha Christie. Agardaremos ás reseñas do alumnado de 2º de ESO para que eles mesmos sexan os que opinen sobre esta maga do suspense.
Ben sabemos que durante as vacacións de verán todos e todas facemos decisivos descubrimentos e algúns gardan relación coa lectura: Paradero desconocido da novelista norteamericana Kathrine Kressmann Taylor é un deles. Trátase dunha novela curta pertencente ao xénero epistolar e con trasfondo histórico. Contarémosvos no mes de novembro que opinaron os vosos compañeiros e compañeiras de 4º de ESO.
E xa para rematar polo de agora, outras dúas novidades para a nosa Biblioteca: La piel fría de Albert Sánchez Piñol e a versión en novela gráfica de Diario de Ana Frank.
A primeira e inquedante proposta mistura a ciencia ficción co terror, ingredientes idóneos para que xa en 2017 coñecese a súa adaptación ao cinema.
A segunda xa non precisa presentación. Segue a ser para moitos lectores e lectoras un libro que marca e que non nos deixe indiferentes ante o horror.
Desexamos que sexan do agrado de todos e de todas!
Ningún comentario:
Publicar un comentario